فن

رجوات منصور .. سخروا منها فأصبحت ملكة جمال المدينة المنورة

رجوات منصور .. سخروا منها فأصبحت ملكة جمال المدينة المنورة ..

✍️ أكيد كلنا عارفين فيلم ليلة الدخلة بطولة حسن فايق وإسماعيل ياسين والقصري وناس كتير من زمن الفن الجميل ..

✍️ الفيلم ده كان في ممثلة أسمها رجوات منصور وكان أسمها في الفيلم “توتو” وناس كتير متعرفش عنها حاجة غير انها كانت قايمة بدور واحدة شكلها وحش هي وأختها “سوسو” ..

✍️ رجوات منصور من محافظة أسوان ومن أسرة غنية، وكل أخواتها اتجوزو الا هي عشان شكلها ..

✍️ رجوات سابت أسوان وسافرت القاهرة واشتغلت حاجات كتير، لغاية مالعبت الصدفة دور كبير في حياتها بعد ماشافها واحد بيشتغل في السينما ..

✍️ الراجل ده عرض عليها دور في فيلم ليلة الدخلة عشان كان مطلوب بنتين وحشين، وفعلا رحبت رجوات بالدور ومثلت في الفيلم وقامت بدور بنت من البنتين الوحشين وهو دور “توتو” ..

✍️ الفيلم حقق نجاح كبير وقتها وبعد كده اتعرض عليها بعض الأدوار في أفلام تانية ..

✍️ سكنت “رجوات منصور” في عماره كان جارها فيها واحد شيخ عايش هو وأخواته التمانية وأمه العجوز، وكانت رجوات بتحب تساعد امه في تربية أولادها، والشيخ ده كان متجوز ارمله عندها اربع اولاد وكان بيساعدها في تربيتهم ..

✍️ أم الشيخ أعجبت برجوات وبطيبة قلبها فعرضت عليه أنه يتجوزها، ووافق الشيخ ووافقت رجوات ..

✍️ بعد فترة ماتت مرات الشيخ وسابت له اربع ايتام، وأصرت رجوات علي تربيهم مع اخوات الشيخ التمانية، وبعدها بفترة ماتت ام الشيخ وبعدها مات الشيخ، ولقت رجوات نفسها وفي رقبتها 12يتيم، فكرست حياتها ليهم وكانت مضطرة أنها تشتغل علشان تقدر تربي 12 يتيم، وفعلا أشتغلت في البيوت والمحلات ..

✍️ الولاد كبروا وأتخرجوا دكاترة ومهندسين وكلهم بقوا في وظائف كويسة، وقرر كل واحد من ال 12 ياخدها تعيش عنده شهر ويبقي مسئول عنها وعن اكلها وشربها وخدمتها، لحد ما واحد منهم وكان دكتور قرر أنه يطلعها معاه تحج، وكانت أمنية “رجوات” أنها تحج وتزور بيت ربنا ..

✍️ وهما هناك تاهت “رجوات” في الحرم النبوي وفضل يدور عليها لغاية مالقاها ساجدة في الحرم النبوي ميته، واندفنت في المدينة المنورة بعد رحلة كفاح طويلة في تربية 12 يتيم ..

👌قصة “رجوات منصور” بتعلمنا اننا منتريقش علي حد شكله مش عاجبنا، لأن ممكن جدا ان اللي بنتريق علي شكله ومش عاجبنا، يكون عند ربنا اجمل من ناس كتير جدا بنشوفهم وبيعجبنا شكلهم ..

رحم الله “رجوات منصور” وأسكنها فسيح جناته ..

الصفحة الرسمية لموقع الملك فاروق الاول – فاروق مصر

✍️ Mai 🌸

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

أنت تستخدم إضافة Adblock

من فضلك قم بتعطيل مانع الاعلانات
%d مدونون معجبون بهذه: