الجميلة حنان مطاوع من اللي يتقال عليهم “صبروا ونالوا”.. سنة ٢٠٠٦ خطوبتها اتفسخت من الفنان أحمد رزق واتجوز في نفس السنه، حنان اتجوزت بعد فسخ الخطوبة دي مش بسنة ولا اتنين لأ بـ ١٠ سنين، لا قالت زي ما هو اتجوز أنا لازم اتجوز ولا اتسرعت في اختيارها، حتى بعد محاولات فاشلة قررت إنها تلغي موضوع الارتباط نهائي، ولما اتسألت في لقاء عن جوازها من المخرج أمير اليماني قالت:
“لما صارحني بمشاعره قولتله أنا مبفكرش في الارتباط، أصل لما تقعدي فترة مستقلة واتعودتي على كده وكبرتي بيبقى صعب أوي الاختيار وصعب إن يتضحك عليكي بكلمتين بس لقيت فيه حاجات رائعة جدا حنون ومريح، مصدقاه كده، مش داخل عشان يشكّلني وقابلني زي مانا ودي حاجه مش دايما تلاقيها، وفيه لغة مشتركة بيني وبينه، لأن بيبقى صعب تبقي مع حد كل اهتماماتك هو بعيد عنها، طبعا فيه اختلافات بس فيه نقاط تلاقي كتير، هو اتسرسب جوايا بالحنية..”
ولما اتسأل جوزها عنها قال: “حنان شخصية مختلفة على كل المستويات، الثقافي، الديني، الإنساني، حتى موهبتها، أنا كنت متابعها من أيام فيلم الغابة وواثق إنها هتكون ممثلة صف أول بجدارة..”
المذيع سأله: “ايه أكتر حاجه بتزعجك في حنان؟”
قاله: “لما تكون متوترة..”
سأله: “بتبقى عصبية؟”
رد عليه: “لأ خالص مش عصبية بس أنا مجرد ما بلمح على وشها إنها متوترة أيا كان السبب أنا بتوتر ومببقاش عارف أعمل ايه يشيل التوتر ده..”
اتجوزوا ٢٠١٦ وهي عندها ٣٧ سنه وخلفت ٢٠١٩ وهي عندها ٤٠ سنه.. ثنائي لطيف جدا وبينهم قصة حب جميلة ♥️
جوازك اتأخر سنة أو حتى ١٠ سنين أفضل بكتير من إنه يتبني مع شخص غلط وتعيشي عمرك كله ندمانه..
ربنا بيعوض وعوضه بيبقى حلو أوي، أحلى من اللي قلبك اتمناه وعقلك اتخيله بمراحل. ♥️
