{ تحياتى لاولاد الاصول….}
بقلم سهير حمدي
تعالوا اكلمكم شوية عن ولاد الأصول إللي فعلا مبقناش بنقابلهم في حياتنا كتير للأسف وأصبحوا قله فى زمن المصالح وتصفيه الحسابات .
بتعرف ابن الأصول إزاي؟؟؟؟؟؟؟؟
أنا أقول لك،،،
* عمره ما ينكر فضل حد بعد فضل ربنا عليه أو ينساه.
* بيفضل باقي على العشرة لحد آخر لحظة وبيعمل كل إللي عليه وزيادة.
* ما بيردش الأذي بالأذي.
* وقت الشدة لو احتجته لازم هتلاقيه ويمكن من غير ما تطلب كمان هتلاقيه قدامك.
* بيساعد الكل من غير أي مصلحة تعود عليه.
* إبن الأصول كرامته عنده رقم 1 ومستحيل هيقبل أي إهانة، ونفسه عزيزة عليه فوق ما خيالك ممكن يوديك.
* إبن الأصول بيعرف يعتذر. لو غلطان مش بيستكبر، يقول أنا آسف وغلطت فعلاً وغلطه ما بيكرروش.
* إبن الأصول كلمته واحدة، لما يقولك هأعمل صدقه.
* إبن الأصول ضميره من جواه ييتحكم فيه وما بيسلمش ودانه لحد.
* إبن الأصول صاحب صاحبه جداً، مستحيل يبيع صاحبه علشان مصلحته.
* إبن الأصول حد جدع بالفطرة. الطيبة ملازماه.
* إبن الأصول بيعرف يعاتب مرة واتنين وثلاثة علشان مش من طبعه إنه يفرط في حد بسهولة. بس لما بيفرط ربنا ما يوريك عمرك ما هتعرف ترجعه تاني!
* إبن الأصول ملوش في الحوارات، بيقولك في وشك إللي هو عايزه وإيه إللي ينفع وإيه إللي ما ينفعش. اللف والدوران مش سكته.
* إبن الأصول عزيز وله بدل العزيز عزيز واتنين، مش زي غيره مالوش غالي.
* إبن الأصول لو اتظلم عمره ما يظلم. بيسيب ربنا يجيبله حقه.
* إبن الأصول يصفي بسرعة لو لقاك شاري، وينسي بسرعة لو لقاك بايع.
* إبن الأصول يحب الخير لغيره حتي لو مش هيطول من الخير ده حاجة، ويفرحلك من قلبه بجد.
* إبن الأصول عينه شبعانه عمره ما يبص في رزق غيره ولا يبص في حياة غيره.
* إبن الأصول بيقدر ويحترم أبسط وأقل حاجة حلوة بتعملها معاه.
* إبن الأصول ما بيعرفش يخون ولا يجرح ولا يستغل فرص ولا يستغل حد.
* إبن الأصول صاحب الكل.
* إبن الأصول ما يعديش عليه واجب، ويديلك حقك من غير ما تطلبه.
* إبن الأصول يديلك إللي محتاجة عادي جداً، ويطلع من جيبه لحد آخر قرش معاه. ما بيفكرش في نفسه وبس، طبعه وأصله الكرم.
* إبن الأصول مهما كان ناجح أو عنده كتير أخلاقه غلباه، ما يعرفش يتغر علي خلق الله.
* إبن الأصول مستحيل يعايرك بإللي عمله معاك في يوم، بيسيبك لوحدك تعرف الفرق بينه وبين غيره.
* إبن الأصول جواه رحمة وعدل ودايماً بيحط نفسه مكان غيره.
* إبن الأصول مش لازم يكون مشهور أو إللي بيلبس برندات ولا إللي معاه فلوس ولا إللي راكب افخم عربيات و لا اللى ساكن في أحلي الأماكن ، هو اللى بيتعامل مع الحاجات دى عادى مش اللى منبهر بيها لان فاهم ان قيمته فى ذاته و ميلزموش يعرف اللى حيعرفه علشان الحاجات دى .
* إبن الأصول مش منصب ولا جاه ..المناصب هي اللي بتجيله علشان ربنا يقدره عليها ويشيل مسؤليتها.
